Num 25 | NdeIBE | STEP | Ngesikhathi u-Israyeli esehlala eShithimu, amadoda aqala ukuphinga labafazi bamaMowabi,

Numbers 25

AmaMowabi edukisa u-Israyeli

1 Ngesikhathi u-Israyeli esehlala eShithimu, amadoda aqala ukuphinga labafazi bamaMowabi, 2 bona abamema amadoda ako-Israyeli ukuba eze emihlatshelweni yabonkulunkulu babo. Abantu laba babesidla ukudla kwabonkulunkulu laba njalo bebakhothamele. 3 Ngakho u-Israyeli wahlanganyela ekukhonzeni uBhali wasePhewori. Yikho uNkulunkulu wabathukuthelela kakhulu.

4 UJehova wathi kuMosi, “Thatha bonke abakhokheli balababantu, ubabulale njalo ubeke izidumbu zabo egcekeni emini libalele phambi kukaJehova, ukuze intukuthelo eyesabekayo kaJehova isuke ku-Israyeli.”

5 Ngakho uMosi wathi kubehluleli bako-Israyeli, “Kumele ukuthi munye ngamunye wenu abulale amadoda akini lawo asehlanganyela ekukhonzeni uBhali wasePhewori.”

6 Kwathi indoda ethile yako-Israyeli yaletha umfazi womMidayani emulini yayo khonapho phambi kukaMosi laphambi kwabako-Israyeli bonke ababebuthene bekhala esangweni leThente lokuHlanganela.

7 Kwathi uFinehasi indodana ka-Eliyazari indodana ka-Aroni, umphristi, ekubona lokho, watshiya ababebuthene, 8 wathatha umkhonto wayilandela indoda leyo ethenteni. Wawuphosa umkhonto wabagwaza bubili babo – wayathutsha ngale kom-Israyeli wangena emzimbeni wowesifazana. Ngakho sasesiphela isifo esasesihlasele abako-Israyeli; 9 kodwa labo abasebefile ngenxa yesifo babeyizi 24,000.

10 UJehova wathi kuMosi,

11 “UFinehasi indodana ka-Eliyazari indodana ka-Aroni umphristi, uqedile ukuthukuthelela kwami abantu bako-Israyeli, ngoba wayetshisekela udumo lwami phakathi kwabo njengami, ukuze ngesihawu sami ngingabaqedi. 12 Ngalokho umtshele ukuthi sengisenza isivumelwano sokuthula laye.

13 Yena kanye lezizukulwane zakhe bazakuba lesivumelwano sobuphrsiti esimi njalo, ngoba utshisekelele udumo lukaNkulukulu wakhe njalo wenzele abako-Israyeli indlela yokubuyisana.”

14 Ibizo lendoda yako-Israyeli eyabulawa kanye lowesifazana womMidiyani kwakunguZimri indodana kaSalu, umkhokheli wabemuli yamaSimeyoni. 15 Njalo ibizo lowesifazana womMidiyani owabulawayo lalingu Khozibhi indodakazi kaZuri, induna yesizwana semuli yamaMidiyani.

16 UJehova wathi kuMosi, 17 “Kumele liphathe amaMidiyani njengezitha njalo liwabulale, 18 ngoba aliphathe njengezitha alikhohlisa ngendaba kaPhewori kanye lodadewabo uKhozibhi indodakazi yomkhokheli wamaMidiyani, owesifazana owabulawa ngesikhathi sokuhlasela kwesifo esabakhona ngenxa kaPhewori.”